gré

On dit, A mon gré. à vostre gré, &c. selon mon gré, selon vostre gré, &c. pour dire, Selon mon goust, selon mon sentiment, selon mon opinion, &c. Cela est-il à vostre gré ? cela n’est pas trop à mon gré. on ne peut pas estre au gré de tout le monde. à mon gré son discours a esté trés-beau.

On dit fig. Se laisser aller au gré des flots, au gré du vent, pour dire, Se laisser aller sans résistance au mouvement de l’eau ou du vent.

On dit, Avoir quelque chose en gré. recevoir en gré. prendre en gré, pour dire, Agréer, trouver bon quelque chose, y prendre plaisir. Je vous supplie d’avoir en gré la priere que je vous fais. prenez en gré l’advis que je vous donne.

On dit qu’Un homme a pris en gré de faire un mauvais tour à un autre, pour dire, que De gayeté de cœur, il luy a fait un mauvais tour.

On dit aussi, Prendre en gré, pour dire, Recevoir avec patience, avec résignation. Il faut prendre en gré les afflictions que Lieu nous envoye. prendre la mort en gré.

On dit encore, Sçavoir gré, sçavoir bon gré. sçavoir mauvais gré à quelqu’un, pour dire, Estre satisfait, estre mal satisfait de quelque chose qu’il a dite, ou faite, estre content, ou mécontent de sa conduite, de son procedé. Je luy en sçay bon gré. je luy en sçay le meilleur gré du monde. Et on dit, qu’Un homme se sçait bon gré d’avoir fait quelque chose, pour dire, qu’Il en est ravi, qu’il s’applaudit de ce qu’il a fait.

On dit, De gré à gré, pour dire, A l’amiable, d’un commun accord. Ils ont fait cela de gré à gré.

On dit, Bon gré, mal gré, pour dire, De gré, ou de force.